നീണ്ടു പരന്നു കിടക്കുന്ന ദുനിയാവ്

സൌദി അറേബ്യയിലായിരുന്ന കാലത്താണു മുസ്തഫയെ പരിചയപ്പെട്ടത്. മലപ്പുറം ജില്ലയില്‍ നിന്നും വന്ന ഒരു സാധാരണ മുസ്ലിം. സംസാരിക്കുമ്പോള്‍ കുറച്ചു തമാശകളൊക്കെ പറയുന്ന ഒരു രസികന്‍. സ്വന്തം ജീവിത കഥ ആരെയും രസിപ്പിക്കും വിധം അദ്ദേഹം പറയുമായിരുന്നു. സൌദിയില്‍ വരുന്നതിനു മുന്നേ ജോലിയൊന്നും ഇല്ലാതിരുന്ന മുസ്തഫ മദ്രസയില്‍ പഠിപ്പിക്കാന്‍ തുടങ്ങി. ഖുറാന്‍ പറഞ്ഞു കൊടുത്തപ്പോള്‍ നീണ്ടു പരന്നു കിടക്കുന്ന ദുനിയാവിനേപ്പറ്റിയും പറഞ്ഞു. അപ്പോള്‍ ഒരു കുട്ടി ചോദിച്ചു.

സ്കൂളിലെ രാജന്‍ മാഷ് പഠിപ്പിച്ചത് ഭൂമി ഉരുണ്ടതാണെന്നാണല്ലോ. ഇവിടെ എന്താ മാഷേ ദുനിയാവ് പരന്നതാണെന്നു പഠിപ്പിക്കുന്നത്?

മുസ്തഫക്കു പെട്ടെന്നുത്തരം പറയാന്‍ പറ്റിയില്ല. അല്‍പ്പം ആലോചിച്ച് ഗൌരവം വിടാതെ പറഞ്ഞു.

അതേ. രാജന്‍ മാഷക്ക് സര്‍ക്കാര്‍ കൊടുക്കുന്ന ശമ്പളം 1000 ഉറുപ്പികയാണ്. മദ്രസയില്‍ എനിക്കു കിട്ടുന്നത് 300 ഉറുപ്പികയും.അതു കൊണ്ട് ഇവിടെ ഭൂമി പരന്നു തന്നെയിരുന്നാല്‍ മതി.

മുസ്തഫ തമാശ പറഞ്ഞതാണെങ്കിലും അതില്‍ വലിയ ഒരു സത്യമുണ്ട്.
 
മൊഹമ്മദ് ഖുറാന്‍ എഴുതിയ കാലത്തെ സാധാരണ മനുഷ്യരുടെ വിശ്വാസം ഭൂമി പരന്നതാണെന്നായിരുന്നു. അതിനെ സാധൂകരിക്കുന്ന അനേകം ആയത്തുകള്‍ ഖുറാനിലുണ്ട്. 1300 വര്‍ഷങ്ങളോളം ഖുറാനും ഹദീസുകളും വായിച്ചു പഠിച്ച് മറ്റുള്ളവരെ പഠിപ്പിച്ച ഇസ്ലാമിക പണ്ഡിതരും മുസ്ലിങ്ങളും അത് തന്നെയാണു വിശ്വസിച്ചത്.
 
ഭൂമി പരന്നു കിടന്നകാലത്തോളം, ഏകദേശം 1000 വര്‍ഷങ്ങളോളം ഖുറാന്‍ വ്യാഖ്യാനിച്ചവര്‍ക്കോ അത് പഠിപ്പിച്ചവര്‍ക്കോ പഠിച്ചവര്‍ക്കോ അത് ഒരു പ്രശ്നമായിരുന്നില്ല. മൊഹമ്മദ് ജീവിച്ച നൂറ്റാണ്ടിനടുത്ത് ജീവിച്ചവരും ഹദീസ് എഴുതിയവരും മൊഹമ്മദ് ഉദ്ദേശിച്ച പരന്ന ഭൂമിയേക്കുറിച്ചേ പരാമര്‍ശിച്ചിട്ടുള്ളു. പക്ഷെ പിന്നീട് ശാസ്ത്രജ്ഞര്‍ ഭൂമിയെ ഉരുട്ടിയെടുത്തപ്പോള്‍ പരന്ന ഭൂമിയേപ്പറ്റി പറഞ്ഞ മൊഹമ്മദിന്റെ ഖുറാനെ ആളുകള്‍ കളിയാക്കാന്‍ തുടങ്ങി. മനുഷ്യാരാശിക്ക് എന്നേക്കും വേണ്ടി എഴുതപ്പെട്ട ദിവ്യ പുസ്തകത്തിലെ ഭൂമി പരന്നിരിക്കുന്നത് മൊഹമ്മദിനും  അള്ളാക്കും നാണക്കേടാണെന്നു മനസിലാക്കിയ ചില മുസ്ലിങ്ങള്‍ ഖുറാനില്‍ ഗവേഷണം നടത്തി ഭൂമിയെ ഉരുട്ടിയെടുത്തു. അതിനു വേണ്ടി ഖുറാനിലെ ചില വാക്കുകള്‍ക്ക് മൊഹമ്മദ് ഉദേശിക്കാത്ത അനര്‍ത്ഥം നല്‍കി.
 
ഖുറാനെ ഇതു പോലെ പുനര്‍വായന നടത്തി പുതിയ രീതിക്കനുയോജ്യമായ തരത്തില്‍ വ്യാഖ്യാനിക്കുന്നതില്‍ മുന്‍പന്തിയില്‍ നിന്ന വ്യക്തിയാണ്, യൂസുഫ് അല്‍ ഖര്‍ദാവി. അല്‍ ജസീറ എന്ന ന്യൂസ് ചാനലില്‍ ,അദ്ദേഹം കൈകാര്യം ചെയ്യുന്ന ഒരു പരിപാടിയുണ്ട്. ശാസ്ത്രം ഖുറാനിന്റെ വെളിച്ചത്തില്‍ അവതരിപ്പിക്കുന്നതാണതില്‍. അവിടെ പരിണാമത്തേക്കുറിച്ച് ഒരു ചോദ്യമുണ്ടായി. അതിനദ്ദേഹം നല്‍കിയ മറുപടി അതി വിചിത്രമാണ്.
 
Muslims do not need to worry about the evolution theory as long as it remains a theory, only if it becomes a recognized scientific fact that the Muslim scholars would reinterpret the relevant verses in the Quran to bring them in line with proven scientific facts.
 
അതിങ്ങനെ തര്‍ജ്ജമ ചെയ്യാം. പരിണാമം ഇപ്പോഴുമൊരു നിഗമനം മാത്രമാണ്, ഒരു ശാസ്ത്ര സത്യമായി തെളിഞ്ഞാല്‍ ഖുറാന്‍ വിദഗ്ദ്ധര്‍ വേണ്ട രീതിയില്‍ പ്രസക്തമായ ഖുറാന്‍ ആയത്തുകള്‍ പുനര്‍വ്യാഖ്യാനിച്ച് ഖുറാനെ ശാസ്ത്രത്തിനനുസരിച്ച് പാകപ്പെടുത്തും. അതിനെ മറ്റൊരു രീതിയില്‍ വിശദീകരിക്കാം. ഒരാള്‍ ഒരു കുട്ടിക്ക് ഒരു ചെരുപ്പു വാങ്ങി എന്നിരിക്കട്ടേ. കുട്ടി വളരുന്നതിനനുസരിച്ച് ആ കുട്ടിയുടെ കാലുകള്‍ മുറിച്ച് ചെരുപ്പിടാന്‍ പാകത്തിലാക്കും. പഴയ ചെരുപ്പ് അതേപോലെ സൂക്ഷിക്കും. അതുപേക്ഷിക്കുകയോ വ്യത്യാസം വരുത്തുകയോ ഇല്ല. അതാണു മിക്ക മുസ്ലിങ്ങളുടെയും ചിന്താഗതി.
 
മുസ്ലിങ്ങളല്ലാത്ത മറ്റ് ചിലരുടെയും ചിന്താഗതിയും ഇതു തന്നെ. വലിയ സത്യാന്വേഷണങ്ങള്‍ നടത്താറുള്ള ഒരാള്‍ ഖുറാനെ പ്രകീര്‍ത്തിച്ച് ഇതു പോലെ ചില പൊട്ടത്തരങ്ങള്‍ എഴുതിയത് വായിച്ചിട്ടുണ്ട്. കല്‍ക്കി ബിഗ് ബാംഗ് ഖുറാനില്‍ കണ്ടെത്തിയതും ഇതു പോലെതന്നെ. കാലം എന്ന ബ്ളോഗര്‍ എന്നോട് വായിക്കാന്‍ ഉപദേശിച്ച കാട്ടിപ്പരുത്തി എഴുതിയ ജബ്ബാറിനുള്ള മറുപടികളില്‍ സമാനമായ ഒരു പരാമര്‍ശം കണ്ടു.

ഖുറാനിലെ ഒരു പരാമര്‍ശമാണു താഴെ.

രാത്രിയെക്കൊണ്ട്‌ അവന്‍ പകലിന്‍മേല്‍ ചുറ്റിപ്പൊതിയുന്നു. പകലിനെക്കൊണ്ട്‌ അവന്‍ രാത്രിമേലും ചുറ്റിപ്പൊതിയുന്നു. സൂര്യനെയും ചന്ദ്രനെയും അവന്‍ നിയന്ത്രണവിധേയമാക്കുകയും ചെയ്തിരിക്കുന്നു.

ഇതിനെ കാട്ടിപ്പരുത്തി വിശദീകരിക്കുന്നതിങ്ങനെ.

മനുഷ്യര്‍ക്ക് അനുഗ്രഹമായ ഭൂമിയെ കുറിച്ച് സൂചിപ്പിക്കുന്നിടത്തല്ലാം അതിനെ പരന്നതായും വിരിപ്പായും പറയുന്ന ഖുര്‍‌ആന്‍ അകാശത്തെയും ഭൂമിയേയും കുറിച്ച് പറയുന്നിടത്താണ് പന്തിന്റെ രൂപത്തിലേക്കു വരുന്നത്. ആപേക്ഷികതാ സിദ്ധാന്തത്തിന്റെ പ്രാഥമികത അറിയുന്നവര്‍ ഇതൊന്നു മനസ്സിലാക്കുന്നത് നന്നായിരിക്കും.
 
അവിടെ കാട്ടിപ്പരുത്തി അറ്റ കൈ തന്നെ പ്രയോഗിച്ചു. 1400 വര്‍ഷങ്ങള്‍ക്ക് ശേഷം ഐന്സ്റ്റീന്‍ കണ്ടുപിടിക്കുമെന്ന് അള്ളാക്കുറപ്പുണ്ടായിരുന്ന ആപേക്ഷികതാ സിദ്ധാന്തം തന്നെ അങ്ങു പ്രയോഗിച്ചു. ചുറ്റിപ്പൊതിയുക എന്ന വാക്കിനെ എടുത്ത് അമ്മാനമാടി അത് ഭൂമിക്കു ചുറ്റി പൊതിയുന്നതാണെന്നും സ്ഥാപിച്ചു. എന്തൊരു പ്രൌഡ ഗംഭീര പ്രയോഗം. ആരും കോരിത്തരിച്ചു പോകും. ചുറ്റുക എന്നാല്‍ അത് ഉരുണ്ട സാധനത്തെ തന്നെയാകണം, എന്നാലല്ലെ ഭൂമി ഉരുണ്ടതാകൂ. മുസ്ലിങ്ങള്‍ മയ്യത്താവുമ്പോള്‍ മയ്യത്തിനെ തുണികൊണ്ടു ചുറ്റിപ്പൊതിയാറുണ്ട്. അത് ശവശരീരം ഉരുണ്ടിരിക്കുന്നതുകൊണ്ടാകാം. തിരുവായ്ക്ക് എതിര്‍വായുണ്ടാകാന്‍ ആകില്ലല്ലോ.
 
കാട്ടിപ്പരുത്തിയുടെ ഇഷ്ടവിനോദമായ സാഹിത്യ ഭാവനയൊന്നും ഇവിടെ പ്രയോഗിക്കില്ല. ആപേക്ഷികസിദ്ധാന്തം മാത്രമേ പ്രയോഗിക്കൂ. ഇത് കാട്ടിപ്പരുത്തി ഭൂമിയെ ഉരുട്ടിയെടുക്കുന്ന കഥ. കാട്ടിപ്പരുത്തിയേക്കാളും ആമ്പിയറുള്ള ഇസ്ലാമിക പണ്ഡിതര്‍ ഭൂമിയെ ഉരുട്ടിയെടുക്കുന്നത് മറ്റൊരു തരത്തിലാണ്. അതിനവര്‍ ആധാരമാക്കുന്നത് ഖുറാനിലെ മറ്റൊരു ആയത്തും. അതിങ്ങനെ.
 
79:30. ഭൂമിയോ, അനന്തരം അവന്‍ അതിനെ വിസ്തൃതമാക്കി.
 
ഇത് മൌദൂദി തര്ജ്ജമ ചെയ്ത ഖുറാനിലേതാണ്. വിസ്തൃതമാക്കി എന്നത് എങ്ങനെ വ്യാഖ്യാനിച്ചാലും ഉരുണ്ടത് എന്ന അര്‍ത്ഥം വരില്ല. ഖുറാന്റെ അറിയപ്പെടുന്ന  ഇംഗ്ളീഷ് പരിഭാഷകളിലൊന്നും ഈ അര്‍ത്ഥം കണ്ടിട്ടില്ല.
 
[079:030]

YUSUFALI: And the earth, moreover, hath He extended (to a wide expanse);
PICKTHAL: And after that He spread the earth,
SHAKIR: And the earth, He expanded it after that.
 
അവിടെയൊക്കെ ഉപയോഗിച്ചിരിക്കുന്ന വാക്കുകള്‍ spread, expand. extent എന്നൊക്കെയാണ്. ഇതിനൊന്നും  എത്ര വലിച്ചു നീട്ടിയാലും ഉരുണ്ടത് എന്ന  അര്‍ത്ഥം സുബോധമുള്ള ആര്‍ക്കും കല്‍പ്പിക്കാനാകില്ല.
 
ഹദീസുകള്‍ അനവധിയുണ്ട്. പക്ഷെ കാട്ടിപ്പരുത്തി ഉള്‍പ്പടെയുള്ള മുസ്ലിങ്ങള്‍ ആറു ഹദീസുകളേ പൂര്‍ണ്ണമായും അംഗീകരിക്കാറുള്ളു. മൊഹമ്മദിന്റെ ഇരുണ്ട വശങ്ങള്‍ പരാമര്‍ശിക്കുന്ന തബാരിയുടെ ഹദീസൊക്കെ അവര്‍ക്ക് ഹറാമാണ്. അതു പോലെ മുസ്ലിങ്ങള്‍ ഹറാമായി കരുതി തള്ളിക്കളയുന്ന ഖുറാന്റെ മറ്റൊരു തര്‍ജ്ജമയുണ്ട്. ഖലീഫ എന്ന വ്യക്തിയുടേതാണാ തര്‍ജ്ജമ. അദ്ദേഹം ഇതേ വാചകം തര്‍ജ്ജമ ചെയ്തിരിക്കുന്നത് മറ്റ് തര്‍ജ്ജമക്കാരൊക്കെ തര്‍ജ്ജമ ചെയ്തതില്‍ നിന്നും വിഭിന്നമായാണ്. അതിങ്ങനെയാണ്.
 
[079:030]
Khalifa: He made the earth egg-shaped.
 
ചെരുപ്പിനനുസരിച്ച് കാലു മുറിക്കാന്‍ ഓടി നടന്ന പണ്ഡിതര്‍ക്ക് ഇതില്‍ പരം ഒരു ലോട്ടറി അടിക്കാനില്ല. അതിനു ഖലീഫ എന്ന  ഹറാമി എഴുതി വച്ചതു തന്നെ അങ്ങു ചുറ്റിപ്പൊതിഞ്ഞു. ആ ചുറ്റിപ്പൊതിയലിന്റെ വിശദവിവരങ്ങള്‍ ഇവിടെ വായിക്കാം.
 
കാട്ടിപ്പരുത്തിയുടെ മറ്റൊരു പരാമര്‍ശം കൂടി.


ഇടമുറക് അദ്ദേഹത്തിന്റെ ഖുര്‍‌ആന്‍ വിമര്‍ശിക്കപ്പെടുന്നു എന്ന ഗ്രന്ഥത്തില്‍ ഖുര്‍‌ആന്‍ സൂര്യന്‍ ചലിക്കുന്നു എന്ന ആയത്തിനെ ആദ്യ ലക്കത്തില്‍ പരിഹസിക്കുന്നുണ്ട്. പക്ഷേ പിന്നീട് സൂര്യന്റെ ചലനങ്ങളെ കുറിച്ച് കണ്ടെത്തിയപ്പോള്‍ ഇടമുറകിന്നത് പിന്‍‌വലിക്കേണ്ടി വന്നു എന്നു മാത്രം. ഖുര്‍‌ആന്‍ പറഞ്ഞിടത്തു തന്നെ നില്‍ക്കുന്നു. തിരുത്തലുകള്‍ നമ്മുടെ അറിവിന്നാണ് ബാധകമാവുന്നത്.
 
വളരെ ശരിയാണ്. ഖുറാന്‍ പറഞ്ഞിടത്തു തന്നെ നില്‍ക്കുന്നു. എന്നു വച്ചാല്‍ ചെരുപ്പ് 1400 വര്‍ഷം മുമ്പത്തെ അളവില്‍ നില്‍ക്കുന്നു. ഈ നൂറ്റാണ്ടിലെ കാലുകളൊക്കെ മുറിച്ച് ആ ചെരുപ്പിനു പാകത്തില്‍ ആക്കുന്ന തല തിരിഞ്ഞ ചെരുപ്പുകുത്തിയുടെ റോള്‍ സ്വയം കാട്ടിപ്പരുത്തി ഏറ്റെടുത്തിരിക്കുന്നു.


ഖുറാന്‍ എന്ന പൊത്തകം മൊഹമ്മദ് എഴുതുന്നതിനും കാക്കത്തൊള്ളായിരം വര്‍ഷം മുമ്പേ മനുഷ്യരൊക്കെ കണ്ടതും ചിന്തിച്ചതും എഴുതിയതും സൂര്യന്‍ ചലിക്കുന്നു എന്നാണ്. പക്ഷെ അവരൊക്കെ പറഞ്ഞിടത്തു നിന്നും മാറി. അതിന്റെ കാരണം ഭൂമിക്കു ചുറ്റും സൂര്യന്‍ ചലിക്കുന്നു എന്നതൊരു തോന്നലാണെന്ന തിരിച്ചറിവാണ്. പകരം ഭൂമി സൂര്യനു ചുറ്റും ചലിക്കുന്നു എന്നവര്‍ മനസിലാക്കി. ഭൂമി ചലിക്കുന്ന കാര്യം ഖുറാന്‍ പറയാത്തതുകൊണ്ട് മുസ്ലിങ്ങളൊക്കെ ഭൂമി ഇപ്പോഴും നിശ്ചലമായി നില്‍ക്കുന്നു എന്നു വിശ്വസിക്കുന്നു.

ഭൂമി നിശ്ചലമായി നിന്നിട്ട് സൂര്യന്‍ ചലിക്കുന്നു എന്നാണു മൊഹമ്മദ് ഖുറാനില്‍ ഉദ്ദേശിച്ചത്. അത് സൂര്യന്‍ കിഴക്കു നിന്നു പടിഞ്ഞാറോട്ട് സഞ്ചരിക്കുന്നു എന്ന തോന്നലില്‍ നിന്നും. സൂര്യന്‍ ചലിക്കുന്നു എന്ന് ശാസ്ത്രം പറയുന്നത് സൂര്യനും ചന്ദ്രനും ഉള്‍പ്പടെയുള്ള സൌരയൂധം ഒന്നാകെ ക്ഷീരപദത്തിലെ കേന്ദ്ര ബിന്ദുവിനു ചുറ്റും സഞ്ചരിക്കുന്നതിനെയാണ്. ഖുറാനും മൊഹമ്മദും അള്ളായും കൂടെ കണ്ടുപിടിച്ചു വച്ചിരിക്കുന്നത് സൌരയൂധം സഞ്ചരിക്കുന്നു എന്നല്ല. അതൊക്കെ കാട്ടിപ്പരുത്തി മനസിലാക്കിയെടുക്കുമെന്നും തോന്നുന്നില്ല. അതിനു തല തിരിഞ്ഞ ചിന്തയല്ല വേണ്ടത്. നേരെ ചിന്തിക്കാനുള്ള ശേഷിയാണു വേണ്ടത്.
 
ഭൂമി വാസ്തവത്തില്‍ സൂര്യനു ചുറ്റും ഒരു പഥത്തില്‍ കൂടിയും സൂര്യനോടൊപ്പം വേറൊരു പഥത്തില്‍കൂടിയും സഞ്ചരിക്കുന്നു. ഈ രണ്ട് സഞ്ചാരപഥമുണ്ടായിട്ടും അതില്‍ ഒന്നു പോലും അള്ളാക്കു മനസിലായില്ല. അതു കൊണ്ടാണല്ലോ ലോകവസാനം വരെയുള്ള രഹസ്യങ്ങളൊക്കെ എഴുതി വച്ചിരിക്കുന്ന ഖുറാന്‍ എന്ന പൊത്തകത്തില്‍ അതേക്കുറിച്ച് ഒരക്ഷരം പോലും പറയാന്‍ കഴിയാതെ പോയതും.
 
ഖുറാന്‍ അവകാശപ്പെടുന്നത് അതിന്റെ ഭാഷ ലളിതമാണെന്നാണ്. പല മുസ്ലിങ്ങളും അതിനില്ലാത്ത അര്‍ത്ഥം കല്‍പ്പിച്ചു നല്‍കി ബാക്കിയെല്ലാം അതിനകത്താക്കാന്‍ ശ്രമിക്കുന്നു. ശാസ്ത്രം ചില നിഗമനങ്ങള്‍ എടുക്കുമ്പോഴേക്കും അവ ഖുറാനിലുണ്ടെന്നു വീമ്പിളക്കുന്ന ഇവര്‍ക്ക്  നാളെ അത് ശാസ്ത്രം തള്ളിക്കളഞ്ഞാല്‍  ഇളിഭ്യരാകുമെന്നൊന്നും ചിന്തിക്കാനുള്ള ശേഷി ഇല്ല. ഇവര്‍ക്കിതൊന്നും പ്രശ്നമല്ല. നാളെ വരുന്ന നിഗമനങ്ങളെക്കൂടി ഉള്‍ക്കൊള്ളാന്‍ പാകത്തില്‍ അവര്‍ ഖുറാന്‍ പുനര്‍വ്യാഖ്യാനിക്കും. എല്ലാക്കാലത്തേക്കുമുള്ള പൊത്തകമെന്നു പറഞ്ഞതിന്റെ അര്‍ത്ഥമിതാണ്. ഏത് കാലത്തിനു ചേരുന്ന തരത്തിലും വ്യാഖ്യാനിക്കാനുള്ള പൊത്തകം.


ഓ ടോ: യൂസുഫ് അല്‍ ഖര്‍ദാവി മദ്യത്തേക്കുറിച്ച് രസകരമായ ഒരു ഫത്വ ഇറക്കിയിട്ടുണ്ട്. കാട്ടിപ്പരുത്തി വളരെ ഗംഭീരമായി ഖുറാന്‍ മദ്യം നിഷിദ്ധമാക്കി എന്നു വാദിക്കുമ്പോള്‍ മുസ്ലിങ്ങള്‍ ചെറിയ അളവില്‍  മദ്യം കഴിക്കുന്നതില്‍ തെറ്റില്ല എന്നാണദ്ദേഹത്തിന്റെ നിലപാട്. അതേക്കുറിച്ച് ഇവിടെ വായിക്കാം. ഇത് കാലു ചെരുപ്പിനനുസരിച്ച് മുറിച്ചതോ ചെരുപ്പ് കാലിനനുസരിച്ച് മാറ്റിയതോ?