ലാല്‍ സലാം

ചന്ദ്രശേഖരന്‍ എന്ന കമ്യൂണിസ്റ്റുകാരന്‍ അതിദാരുണമായി കൊല ചെയ്യപ്പെട്ടപ്പോള്‍ കേരള സാമൂഹ്യ രാഷ്ട്രീയ മണ്ഡലങ്ങളെ അത് അക്ഷരാര്‍ത്ഥത്തില്‍  പിടിച്ചു കുലുക്കി. പരമ്പരാഗത കമ്യൂണിസ്റ്റുവിരുദ്ധരും സി പി എം വിരുദ്ധരും അത് സി പി എം എന്ന പാര്‍ട്ടിക്കെതിരെ കുറ്റവിചാരണക്കായി ഉപയോഗിച്ചു. പക്ഷെ കേരള സി പി എം പാര്‍ട്ടി നേതാക്കളില്‍ പലരും  ഈ കുറ്റവിചാരണ അര്‍ഹിക്കുന്നതാണെന്ന രീതിയില്‍ പ്രതികരിച്ചു. അതിന്റെ മുന്നണിയില്‍ നിന്നത് പിണറായി വിജയനായിരുന്നു.

 ചന്ദ്രശേഖരന്‌ അന്ത്യാഞ്ജലി അര്‍പ്പിക്കാന്‍ വി എസ് പോകുമെന്നറിഞ്ഞപ്പോള്‍ അദ്ദേഹത്തെ അതില്‍ നിന്നും വിലക്കാന്‍ നോക്കി  വിജയന്‍. പക്ഷെ വിഎസ് അതിനെ ഗൌനിച്ചില്ല. വേണ്ടതിനും വേണ്ടാത്തതിനും വി എസിനെ വിലക്കുക എന്നത് കുറച്ചു നാളായി വിജയന്റെ ദിനചര്യയുടെ ഭാഗമാണല്ലോ. കുഞ്ഞനന്തന്‍ നായരുടെ വീട്ടില്‍ പോകുന്നതില്‍ നിന്നും വി എസിനെ വിലക്കാന്‍ നോക്കി. പക്ഷെ അദ്ദേഹം വക വച്ചില്ല. പിന്നെ അവിടെ  നിന്നും ഭക്ഷണം കഴിക്കുന്നതിനു വിലക്കേര്‍പ്പെടുത്തി. പക്ഷെ ഇളനീര്‍ കുടിച്ച്  വിജയനെ നാണം കെടുത്തി. ഇതൊക്കെ അറിഞ്ഞുകൊണ്ട്  വീണ്ടും ഒരു വിലക്കുമായി വിജയന്‍ വന്നു. പക്ഷെ വി എസ് അതിനെയും വകവച്ചില്ല.

ചന്ദ്രശേഖരന്റെ ശവശരീരത്തോടു പോലും നീതികാണിക്കാതെ അദ്ദേഹം കുലം ​കുത്തി ആണെന്നും, ഒറ്റുകാരന്‍ ആണെന്നും, വര്‍ഗ്ഗവഞ്ചകന്‍  ആണെന്നും  വിജയന്‍  ആവര്‍ത്തിച്ചു.  ധാര്‍മ്മികത   മുഴുവന്‍ ചോര്‍ന്നു പോയ അവസ്ഥയിലായി സി പി എം എന്ന പാര്‍ട്ടി. ഇനിയും സി പി എമ്മില്‍ അവശേഷിക്കുന്ന ധാര്‍മ്മികത ഉള്ളതുകൊണ്ട് വി എസിന്‌ വിജയന്റെ അഭിപ്രായത്തോട് യോജിക്കാനായില്ല. അദ്ദേഹം പരസ്യമായി തന്നെ വിജയന്റെ അഭിപ്രായത്തെ നിരാകരിച്ചു. അത് പാര്‍ട്ടിയുടെ അഭിപ്രായമല്ല, എന്നും പിണറായി വിജയന്റെ വ്യക്തിപരമായ അഭിപ്രായമാണെന്നും വി എസ് പറഞ്ഞു. സി പി എമ്മിന്റെ ചരിത്രത്തില്‍ ആദ്യമായിട്ടാണ്, പാര്‍ട്ടി സെക്രട്ടറിയുടെ നിലപാടിനെ മുതിര്‍ന്ന ഒരംഗം പൊതു വേദിയില്‍ നിരാകരിക്കുന്നതും. അതു കേട്ട ഉടനെ വിജയന്റെ ചാവേറുകളായ ഭാസുരേന്ദ്ര ബാബുവും  മാധവന്‍കുട്ടിയും ഏക സ്വരത്തില്‍  പ്രഖ്യാപിച്ചു. ഇനി  വി എസും പിണറായി വിജയനും  ഒരുമിച്ച് ഒരു പാര്‍ട്ടിയില്‍ ഉണ്ടാകില്ല.

ചന്ദ്രശേഖരന്റെ വീട്ടില്‍ വി എസ് പോകും എന്ന് കേരളത്തിലെ എല്ലാവരും പ്രതീക്ഷിച്ചിരുന്നതാണ്. പക്ഷെ അത് എന്ന് സംഭവിക്കുമെന്നത് തീര്‍ച്ചയുണ്ടായില്ല. ഇതിനിടയില്‍ മണിയുടെ വക അടിയേറ്റ് പാര്‍ട്ടി ഞെട്ടിത്തരിച്ചു നിന്നു. പക്ഷെ വിജയനു കുലുക്കമൊന്നുമുണ്ടായില്ല. മണിയുടെ പ്രസംഗത്തില്‍ ചില വ്യതിയാനങ്ങളുണ്ടായി എന്നും അത് തിരുത്തും എന്നുമേ അദ്ദേഹം പറഞ്ഞു. മണി പല കൊലപാതകങ്ങളും ഏറ്റെടുത്തകൂടെ വി എസിനെ അധിക്ഷേപിക്കാനും മറന്നില്ല. ചന്ദ്രശേഖരന്‍ വി എസിന്റെ അമ്മയിയപ്പനാണോ എന്നു വരെ മണി ചോദിച്ചു.  എങ്കില്‍ ചന്ദ്രശേഖരന്‍ വി എസിനാരാണെന്നു മണി ഇപ്പോള്‍ തന്നെ അറിയട്ടെ എന്ന് വി എസും .  ഉടനെ ചന്ദ്രശേഖരന്റെ വീട്ടിലേക്ക് പോകാന്‍ തീരുമാനിച്ചു. പാര്‍ട്ടിയുടെ ഉന്നത നേതാക്കള്‍ അറിഞ്ഞു കൊണ്ടു തന്നെ ആണദ്ദേഹം  അവിടെ പോയതും. വിലക്കാന്‍ നോക്കി കാണും. അല്ലെങ്കില്‍ വിജയന്‍ മറ്റൊരാളായി ജനിക്കേണ്ടിയിരിക്കുന്നു.


ഒരു കമ്യൂണിസ്റ്റില്‍ നിന്നും ജനം പ്രതീക്ഷിക്കുന്ന നടപടിയേ വി എസ് ചെയ്തുള്ളു. ഇത്കുറച്ചു കൂടെ നേരത്തെ ആക്കാമായിരുന്നു എന്നു മാത്രം. തന്റെ ഉറച്ച അനുയായി ആയിരുന്ന ചന്ദ്രശേഖരന്റെ വെട്ടേറ്റ മുഖം ഇത്ര നാളും അദ്ദേഹത്തിന്റെ ഉറക്കം കെടുത്തിയിരിക്കണം. ഇനിയും നീട്ടിക്കൊണ്ടുപോകാനാകാത്ത വിധം അതദ്ദേഹത്തെ മഥിച്ചപ്പോള്‍ ആ വീട്ടിലേക്ക് വി എസ് പോയി. പിണറായി വിജയനോ പ്രകാശ് കരാട്ടിനോ ഇത് ചെയ്യാമായിരുന്നു. വിജയനൊരു പക്ഷെ അവിടെ സ്വീകരിക്കപ്പെടുമായിരുന്നില്ല. എങ്കിലും പോകാന്‍ അഗ്രഹിക്കുന്നു എന്ന ഒരു വാക്കു പറയാമായിരുന്നു. പക്ഷെ മനസില്‍ അടിഞ്ഞുകൂടിയ കുടിലത അതദ്ദേഹത്തേക്കൊണ്ട് പറയിച്ചില്ല. പ്രകാശ കാരാട്ട് നായനാര്‍ അനുസ്മരണ സമ്മേളനത്തില്‍ പങ്കെടുക്കാന്‍ മംഗലാപുരംവഴിയാണു  വന്നത്.  കാസര്‍കോട്ട് വിശ്രമിച്ചു  പെരളശേരിയില്‍ വന്ന് പ്രസംഗിച്ച് അതേ വഴിയിലൂടെ തിരിച്ചു പോയി. പ്രകാശ് കാരാട്ട് ചന്ദ്രശേഖരന്റെ വീട്ടില്‍ അസ്വീകാര്യനാണെന്ന് ആരും പറഞ്ഞു കേട്ടിട്ടില്ല. അത് ചെയ്തിരുന്നെങ്കില്‍ സി പി എമ്മിനു വിജയന്‍ അവതരിപ്പിക്കുന്ന പൈശാചികതയുടെ മുഖം മാത്രമല്ല, മാനവികതയുടെ മുഖം കൂടി ഉണ്ടെന്ന് ലോകത്തെ ബോധ്യപ്പെടുത്താന്‍ കഴിയുമായിരുന്നു. വിജയനും കാരാട്ടും പരാജയപ്പെട്ടിടത്ത് വി എസിനു വിജയിച്ചേ പറ്റൂ.  സി പി എമ്മില്‍ ഇനിയും അവശേഷിക്കുന്ന മാനവികതയുടെയും ധാര്‍മ്മികതയുടെയും  മുഖമാണിന്ന് വി എസ്. ഏറ്റവും ഉചിതമായ കാര്യമാണദ്ദേഹം ചെയ്തതും.

മറ്റേതൊരു കൊലപതകവും പോലെ വെറുമൊരു രാഷ്ട്രീയ കൊലപാതകമായി ഭാവിയില്‍ എഴുതി തള്ളപ്പെടേണ്ടിയിരുന്ന ഈ കൊല പാതകം ഇപ്പോള്‍ കേരളരാഷ്ട്രീയത്തിന്റെ ഗതി നിര്‍ണ്ണയിക്കുന്ന സംഭവം ആയി മാറി.  കൂടാതെ   സി പിമ്മിലെ ഔദ്യോഗ നേതൃത്വത്തിനു പുതിയ ഒരു പട്ടം ചാര്‍ത്തി കൂടി  കൊടുത്തു. കൊലപാതകികളുടെ ഗൂഡ സംഘം. ഇടുക്കി ജില്ലാ സെക്രട്ടറി മണി അതിനു പെരുമ്പറയും കൊട്ടികൊടുത്തു.  ഒരു മൃഗത്തിന്റെ ചേഷ്ടയോടെ മണി പറഞ്ഞു.


ഞങ്ങള്‍ ഒരു പ്രസ്താവനയിറക്കി. 13 പേര്‍. വണ്‍, ടൂ, ത്രീ, ഫോര്‍. . . ആദ്യത്തെ മൂന്നുപേരെ ആദ്യം കൊന്നു. വെടിവെച്ചാ കൊന്നത് ഒന്നിനെ. ഒന്നിനെ കുത്തിക്കൊന്നു. ഒന്നിനെ തല്ലിക്കൊന്നു. മനസ്സിലായില്ലേ, ഒന്നാം പേരുകാരനെ ആദ്യം വെടിവെച്ച്, രണ്ടാം പേരുകാരനെ തല്ലിക്കൊന്നു, മൂന്നാം പേരുകാരനെ മൂന്നാമത് കുത്തിക്കൊന്നു.  

ഇതുപോലെയുള്ള കാട്ടു മൃഗങ്ങളുടെ ഇടയില്‍ വി എസിന്റെ ശബ്ദം മാനവികതയുടെയും,ധാര്‍മ്മികതയുടെയും, ആശ്വാസത്തിന്റെയുമാണ്.  സി പി എം എന്ന പാര്‍ട്ടിയുടെ മേല്‍ വീണ കരിനിഴല്‍ കുറച്ചെങ്കിലും കഴുകിക്കളയാന്‍ വി എസിന്റെ സന്ദര്‍ശനത്തിനു സാധിച്ചു.