Thursday, 26 July 2012

കോട്ടയം  സാഹചര്യങ്ങളെക്കുറിച്ചുള്ള സുറിയാനി സഭ പ്രമേയം


( കര്‍ക്കിടകം  21, 22 തീയതികളില്‍ ചേര്‍ന്ന സൂനഹദോസ്   അംഗീകരിച്ചത്)

കോട്ടയം രൂപതയിലെ സ്ഥിതിയും അവിടെ സഭയില്‍ ഉയര്‍ന്നുവന്ന പ്രശ്നങ്ങളും ചര്‍ച്ചചെയ്യുന്നതിന് കര്‍ക്കിടകം 21, 22 തീയതികളില്‍  സൂനഹദോസ്  യോഗം ചേര്‍ന്നു. മേജര്‍ ആര്‍ച്ച് ബിഷപ്പ്  അടക്കം നാല് ബിഷപ്പുമാര്‍ ജൂണില്‍ ഈ വിഷയങ്ങള്‍ ചര്‍ച്ചചെയ്ത ബിഷപ്പ് സിനഡ്  യോഗത്തില്‍ സംബന്ധിക്കുകയുണ്ടായി. ഇതിന്റെ അടിസ്ഥാനത്തില്‍ സൂനഹദോസിന്,   ഒരു റിപ്പോര്‍ട്ട് സമര്‍പ്പിച്ചു. തുടര്‍ന്ന് ചര്‍ച്ചകള്‍ക്കുശേഷം  സൂനഹദോസ്  താഴെ കാണുന്ന പ്രമേയം അംഗീകരിച്ചു.

1. സഭക്ക് മുന്നേറാന്‍ സഹായകരമായ മത സാഹചര്യമായിരുന്നു കേരളത്തിലേത്. ചെറിയ ഭൂരിപക്ഷത്തോടെ നേടിയ വിജയത്തെതുടര്‍ന്നാണ് മുസ്ലിം ലീഗുള്‍പ്പെടുന്ന  സര്‍ക്കാര്‍ രൂപീകരിച്ചത്. ക്രൈസ്തവര്‍ക്ക് അനുകൂലമായ  പല നയങ്ങളും ലീഗ് ഉള്‍പ്പെടുന്ന  സര്‍ക്കാര്‍ തിരുത്തുകയുണ്ടായി. ക്രൈസ്തവ കര്‍ഷക ആത്മഹത്യകള്‍ വീണ്ടും തുടങ്ങി. ക്രൈസ്തവര്‍ ഒഴികെയുള്ള ജാതി- വര്‍ഗീയ ശക്തികള്‍ കൂടുതല്‍ ആക്രമണോത്സുകരാവുകയും അവരെ സംപ്രീതരാക്കുന്ന നഗ്നമായ നടപടികള്‍ യുഡിഎഫ് സര്‍ക്കാര്‍ സ്വീകരിക്കുകയും ചെയ്യുന്നു. അഞ്ചാംമന്ത്രിക്കായുള്ള മുസ്ലിംലീഗിന്റെ ആവശ്യം നായന്‍മാരും ഈഴവരും എതിര്‍ത്തു. സമൂഹത്തിലെ വിവിധ വിഭാഗങ്ങള്‍ക്കിടയില്‍ ഇത് അസംതൃപ്തി സൃഷ്ടിച്ചു.

2. ഈ പശ്ചാത്തലത്തിലാണ് കൊച്ചിയില്‍  20-ാം ദിവ്യകാരുണ്യ സമ്മേളനം  നടന്നത്. ദിവ്യകാരുണ്യ സമ്മേളനം   അംഗീകരിച്ച സാമുദായിക  അടവുനയവും ദൈവശാസ്ത്രപ്രമേയവും സമാപനറാലിയിലെ വമ്പിച്ച ബഹുജനപങ്കാളിത്തവും സഭയുടെ പ്രവര്‍ത്തനങ്ങളും സ്വാധീനവും സംസ്ഥാനത്ത് മുന്നേറുന്നതിന് വഴിയൊരുക്കി.

3. ഈ സാഹചര്യത്തിലാണ് സി. അഭയ കോട്ടയത്ത്  ആത്മഹത്യ ചെയ്തതായി കാണപ്പെട്ടത്. ദിവ്യകാരുണ്യ സമ്മേളനം  കഴിഞ്ഞ് അപ്പോള്‍ കഷ്ടിച്ച് ഒരുമാസം തികഞ്ഞതേയുള്ളൂ. കൊലപാതകം ആണെന്ന് പ്രചരിപ്പിക്കപ്പെട്ട  ഈ ദാരുണ സംഭവം  കടുത്ത രോഷം ഉയര്‍ത്തി; ബോധപൂര്‍വമായ മാധ്യമപ്രചാരണം ഇത് തീവ്രമാക്കി. സംഭവം  നടന്ന ഉടന്‍, പല കേന്ദ്രങ്ങളും സഭയാണ് ഇതിനുത്തരവാദി എന്ന് ആരോപിച്ചു. തുടര്‍ന്ന് പോലീസും ചില നേതാക്കളും  നമ്മുടെ സഭക്കും പുരോഹിതര്‍ക്കും കന്യാസ്ത്രീകള്‍ക്കുമെതിരെ കൊലക്കുറ്റം ചുമത്തി ഒരു പ്രചാരണപ്രളയംതന്നെ സൃഷ്ടിച്ചു. ഇതൊക്കെ വളരെ പ്രതികൂലമായ ഒരു സാഹചര്യത്തിനിടയാക്കി.

4.  പൊലീസ് അന്വേഷണം സഭാ നേതാക്കള്‍ക്കും പ്രവര്‍ത്തകര്‍ക്കും നേര്‍ക്ക് തിരിച്ചുവിടപ്പെട്ടു. താമസിയാതെ അറസ്റ്റുകളും തുടങ്ങി. രണ്ടു പുരോഹിതരും ഒരു കന്യാസ്ത്രിയും അറസ്റ്റ് ചെയ്യപ്പെട്ടു. അത് സഭക്കുള്ളിലും വിശ്വാസികളിലും വലിയ പ്രതിസന്ധിയുണ്ടാക്കി.

5. തുടക്കംമുതല്‍ സഭാനേതൃത്വത്തിന് ഈ സാഹചര്യത്തെ യോജിപ്പോടെ നേരിടാന്‍ സാധിച്ചില്ല. ഇക്കാര്യത്തില്‍ ആര്‍ച്ച് ബിഷപ്പ് കുലശേഖരപ്പെരുമാളുടെയും    ബിഷപ്പ്  സിനഡിന്റെയും   നിലപാട് തനിക്ക് പങ്കുവയ്ക്കാന്‍ കഴിയില്ലെന്ന് വ്യക്തമാക്കുന്ന തുടര്‍ച്ചയായ പ്രസ്താവനകള്‍ ശ്രീ ജൈമോന്‍ പഴയപുര നടത്തി. ഈ തുറന്ന വിമര്‍ശനസമീപനത്തോട് വിയോജിപ്പ് പ്രകടിപ്പിച്ചുകൊണ്ട് മറ്റു ചില വിശ്വാസികള്‍  അദ്ദേഹത്തെ വിമര്‍ശിച്ചു. സിനഡ്  അംഗങ്ങളായ വാലത്തിലും  പാറയ്ക്കലുമാണ് അങ്ങനെ ചെയ്തത്.

6. ധനു  12ന് ഒരു പത്രസമ്മേളനത്തില്‍, അഭയയും  മറ്റു സഭ അംഗങ്ങളും കോട്ടയത്തെ ഒരു കോണ്‍വെന്റില്‍ അരുതാത്ത പലതും കണ്ടത് 1498 ല്‍ അവിഭക്ത സഭയിലുണ്ടായ ഭിന്നിപ്പിനോട് താരതമ്യപ്പെടുത്തി ജൈമോന്‍ പഴയപുര  അവതരിപ്പിച്ചു. കോട്ടയത്ത് ദൈവശാസ്ത്ര പ്രശ്നങ്ങളിന്മേലാണ് ഭിന്നിപ്പുണ്ടായതെന്ന് അദ്ദേഹം പ്രസ്താവിച്ചു. സഭ  വിട്ടുപോയവരെ എങ്ങനെയാണ് അന്നത്തെ  മേജര്‍ ആര്‍ച്ച് ബിഷപ്പ് കര്‍ദിനാള്‍ ലൂസിഫര്‍, "പുത്തന്‍ കൂറ്റുകാര്‍","  എന്ന് വിളിച്ചത് എന്നു ചൂണ്ടിക്കാണിച്ചുകൊണ്ട് അദ്ദേഹം  ആര്‍ച്ച് ബിഷപ്പിനെയും  ലൂസിഫറിനെയും   താരതമ്യപ്പെടുത്തി. സഭയുടെ കോട്ടയം ആര്‍ച്ച് ബിഷപ്പിനെയും  രൂപതയേയും സഭാ നേതൃത്വത്തെയും വെല്ലുവിളിച്ച ശ്രീ ജൈമോന്‍ പഴയപുരയുടെ  ഈ പത്രസമ്മേളനം വലിയ പ്രത്യാഘാതമുണ്ടാക്കി. ഇത് സഭയെ പിന്താങ്ങുന്നവരില്‍ വലിയ ആശയക്കുഴപ്പവും നിരാശയും പരത്തി. കേരളത്തിലും ഇന്ത്യയിലാകെയുമുള്ള മാധ്യമങ്ങള്‍ ഇത് ഉയര്‍ത്തിക്കാട്ടുകയും കേരളത്തില്‍ സഭ  അഗാധമായ ഒരു പ്രതിസന്ധിയിലേക്ക് കൂപ്പുകുത്തിയിരിക്കുകയാണെന്ന് പ്രഖ്യാപിക്കുകയും ചെയ്തു.

7. മീനം   20ന് ശ്രീ ജൈമോന്‍ പഴയപുര മേജര്‍ ആര്‍ച്ച് ബിഷപ്പിനൊരു കത്തയച്ചു. ഇതിന്റെ ഉള്ളടക്കത്തിലെ ചില ഭാഗങ്ങള്‍ കേരളത്തിലെ മാധ്യമങ്ങള്‍ക്ക് ചോര്‍ത്തി നല്‍കപ്പെട്ടു. തൃശൂര്‍   പൂരം  നടന്ന സമയത്ത് ഇതും വലിയ ആശയക്കുഴപ്പം സൃഷ്ടിച്ചു. ഒരു കത്ത് ലഭിച്ചിട്ടുണ്ടെന്നും എന്നാല്‍, അതിന്റെ ഉള്ളടക്കം വളച്ചൊടിച്ചാണ് ദുരുദ്ദേശ്യത്തോടുകൂടി മാധ്യമങ്ങള്‍ റിപ്പോര്‍ട്ട് ചെയ്തതെന്നും മേജര്‍ ആര്‍ച്ച് ബിഷപ്പ് ഒരു പ്രസ്താവനയില്‍ വ്യക്തമാക്കി. (പേജ് ഒന്നിന്റെ തുടര്‍ച്ച).

8. സി. അഭയയുടെ  കുടുംബാംഗങ്ങളെ കാണാന്‍ മേടം   രണ്ടിന് ശ്രീ ജൈമോന്‍ പഴയപുര കോട്ടയത്തെ വീട് സന്ദര്‍ശിച്ചു. സഭയുടെ ബിഷപ്പുമായോ  ഇടവക വികാരിയുമായി ചര്‍ച്ചചെയ്യുകയോ അവരെ അറിയിക്കുകയോ ചെയ്തുകൊണ്ടായിരുന്നില്ല ഇത്. സംഭവത്തിനുശേഷം, സഭാ പിതക്കന്‍മാര്‍   വീട് സന്ദര്‍ശിക്കാന്‍ പാടില്ലെന്ന് അഭയയുടെ വീട്ടുകാര്‍ വിലക്കിയിരുന്നു. തൃശൂര്‍ പൂരം നടക്കുന്ന ദിവസമായിരുന്നു  മേടം    രണ്ട്. ശ്രീ ജൈമോന്റെ  ഈ സന്ദര്‍ശനം ദൃശ്യമാധ്യമങ്ങള്‍ തത്സമയം സംപ്രേഷണം ചെയ്യുകയും ആ ദിവസം മുഴുവന്‍ ആവര്‍ത്തിക്കുകയും ചെയ്തുകൊണ്ടിരുന്നു. പൂരം  നടന്നുകൊണ്ടിരുന്ന തൃശൂരില്‍  ഇത് ദോഷഫലമുണ്ടാക്കി.

9. പുരോഹിതരുടെയും  കന്യാസ്ത്രീയുടെയും അറസ്റ്റ് നടക്കുകയുണ്ടായി. അവരെ ചോദ്യംചെയ്യുന്നതിനിടയില്‍ ശാരീരികമായി പീഡിപ്പിക്കുന്നതു സംബന്ധിച്ച വിവരങ്ങള്‍ ലഭ്യമായപ്പോള്‍ സഭ പ്രതിഷേധപ്രകടനങ്ങള്‍ സംഘടിപ്പിച്ചു. കന്യാസ്ത്രീയുടെ കന്യകാത്വ പരിശോധന വരെ നടക്കുകയുണ്ടായി. ശ്രീ ജൈമോന്‍  ഒരു പരസ്യപ്രസ്താവനയില്‍, പൊലീസ് അന്വേഷണം ശരിയായ ദിശയിലാണ് നടക്കുന്നതെന്നും ഇതില്‍ ഇടപെടാന്‍ പാടില്ലെന്നും പറഞ്ഞു. സഭാസമീപനത്തിന് കടകവിരുദ്ധമായ സമീപനമാണ് ശ്രീ ജൈമോന്റേത് എന്നു കാണപ്പെട്ടു.

10. സൂനഹദോസിനുള്ള കത്തുകളില്‍ കോട്ടയം സഭാനേതൃത്വത്തിന് അക്രൈസ്തവ  വ്യതിയാനമാണെന്ന് ശ്രീ ജൈമോന്‍  കുറ്റപ്പെടുത്തുന്നുണ്ട്. ഈ ആരോപണം സഭ സിനഡ്  തള്ളിക്കളയുന്നു. വിദ്യാഭ്യാസ കച്ചവടം, മെഡിക്കല്‍ കോളേജു പ്രശ്നം, കോഴ വാങ്ങല്‍, തുടങ്ങി  മുമ്പ് ഉയര്‍ന്നുവന്ന പ്രശ്നങ്ങളിന്മേല്‍ സിനഡിന്റെ  ഇടപെടലുകളെതുടര്‍ന്ന് തീരുമാനം ഉണ്ടായിട്ടുള്ളതാണ്. സൂനഹദോസും ദിവ്യകാരുണ്യ സമ്മേളനവും  മുന്നോട്ടുവച്ചിട്ടുള്ള അടവുനയങ്ങളാണ് കോട്ടയം രൂപത പിന്തുടര്‍ന്നുപോരുന്നത്. സാമുദായിക പ്രശ്നങ്ങളില്‍ സൂനഹദോസിന്റെയും ബിഷപ്പ് സിനഡിന്റെയും  എല്ലാ തീരുമാനങ്ങളും കോട്ടയം രൂപത പാലിച്ചുപോന്നിട്ടുണ്ട്.

11. സാന്റിയാഗോ മാര്‍ട്ടിന്‍   വായ്പ്പാ പ്രശ്നം ജൈമോന്‍  കത്തില്‍ ഉന്നയിച്ചിട്ടുണ്ട്. ഇത് കഴിഞ്ഞ മേജര്‍ ആര്‍ച്ചു ബിഷപ്പിന്റെ  കാലത്ത് കൂരിയ  തീരുമാനമെടുത്തുകഴിഞ്ഞിട്ടുള്ള കാര്യമാണ്. 18-ാം ദിവ്യകാരുണ്യ സമ്മേളനം   സഭയുടെ നേതൃത്വത്തിലുള്ള രൂപതകളും സ്ഥാപനങ്ങളും   വിദേശവായ്പയും സഹായങ്ങളും കോഴയും, കൈമടക്കും സ്വീകരിക്കുമ്പോള്‍ പാലിക്കേണ്ട സമീപനം വിശദീകരിച്ചിട്ടുണ്ട്.

12. വിദ്യാഭ്യാസ കച്ചവട  കാര്യത്തില്‍ ആര്‍ച്ച് ബിഷപ്പ് കുലശേഖരപ്പെരുമാളിനെതിരെ   പഴയ ആരോപണം ശ്രീ ജൈമോന്‍  ഉന്നയിച്ചിട്ടുണ്ട്. മേടത്തില്‍ ചേര്‍ന്ന കൂരിയയും, സൂനഹദോസും,  ഈ പ്രശ്നം ആഴത്തില്‍ പരിശോധിക്കുകയും അതിന്റെ അടിസ്ഥാനത്തില്‍  കുലശേഖരപ്പെരുമാളിനു നേരെയുള്ള ഈ ആരോപണങ്ങളില്‍ ഒരു കഴമ്പുമില്ലെന്ന നിഗമനത്തില്‍ എത്തിച്ചേരുകയും ചെയ്തിട്ടുള്ളതാണ്.

13. അതുകൊണ്ട് സാമുദായികവും ദൈവശാസ്ത്രപരവുമാണ് തന്റെ ഭിന്നതകള്‍ എന്ന് ശ്രീ ജൈമോന്‍ പറയുന്നതിന് ഒരു അടിസ്ഥാനവുമില്ല. സാമുദായികമായ വ്യതിയാനമാണ് ഭിന്നമായ അഭിപ്രായങ്ങളെ അടിച്ചമര്‍ത്തുകയും വ്യത്യസ്ത സ്വരങ്ങളെ ഉന്മൂലനംചെയ്യുകയും ചെയ്യുന്ന സംഘടനാപരമായ പ്രവണത എന്ന ജൈമോന്റെ യുക്തി സൂനഹദോസിന്,  അംഗീകരിക്കാന്‍ കഴിയില്ല. ഇത്തരം ആരോപണങ്ങള്‍ വിഭാഗീയ ഉദ്ദേശ്യത്തോടുകൂടിയാണ് ഉയര്‍ത്തുന്നത്.

14. സഭയുടെ കോട്ടയം രൂപതയെ  ജനമധ്യത്തില്‍ പരസ്യമായി കുറ്റപ്പെടുത്തുന്ന അടിസ്ഥാനരഹിതങ്ങളായ പ്രസ്താവനകള്‍ ഇറക്കുകയും സഭയെ ദുര്‍ബലപ്പെടുത്തുന്ന പ്രവര്‍ത്തനങ്ങളില്‍ ഏര്‍പ്പെടുകയും ചെയ്തതിന് ശ്രീ ജൈമോനെ  ശക്തമായി വിമര്‍ശിക്കാന്‍  കര്‍ക്കിടകം   21, 22 തീയതികളില്‍ ചേര്‍ന്ന സൂനഹദോസ് തീരുമാനിച്ചു. ആര്‍ച്ച് ബിഷപ്പിനെ ലൂസിഫറിനോട്  ഉപമിച്ചത് ശരിയായില്ലെന്ന്, ചര്‍ച്ചകള്‍ക്കുശേഷം ശ്രീ ജൈമോന്‍ സൂനഹദോസില്‍  സ്വയംവിമര്‍ശനപരമായി പറഞ്ഞു. പൂരദിവസമായ മേടം രണ്ടിന് താന്‍ കോട്ടയത്ത് പോയത് ഒഴിവാക്കേണ്ടതായിരുന്നു എന്നും പറയുകയുണ്ടായി.

15. ഇതിന്റെ അടിസ്ഥാനത്തില്‍ സഭയുടെ അടിസ്ഥാനതത്വങ്ങളുടെ ലംഘനത്തിനും തെറ്റായ പ്രസ്താവനകള്‍ നടത്തിയതിനും ശ്രീ ജൈമോനെ  പരസ്യമായി ശാസിക്കുവാന്‍ സൂനഹദോസ്  തീരുമാനിച്ചു. ഈ സ്വയംവിമര്‍ശന പരാമര്‍ശങ്ങള്‍ ശ്രീ ജൈമോന്‍ തന്നെ പൊതുജനമധ്യത്തില്‍ പരസ്യമായി പ്രകടിപ്പിക്കേണ്ടതാണെന്നും സൂനഹദോസ് നിര്‍ദേശിച്ചു. സഭക്കുനേരെയുള്ള കടന്നാക്രമണങ്ങളെ ഐക്യത്തോടുകൂടി അഭിമുഖീകരിക്കുന്നതിന് സഹായകമായ വിധത്തില്‍ ശ്രീ ജൈമോന്‍  പെരുമാറുമെന്ന്  സൂനഹദോസ്  പ്രതീക്ഷിക്കുന്നു.

16. സി. അഭയയുടെ  കൊലപാതകവുമായി ബന്ധപ്പെട്ട് സഭക്കെതിരായി ഉയര്‍ന്ന ആക്രമണങ്ങളെ പ്രതിരോധിക്കുന്നതിനുള്ള ക്യാമ്പയിന്‍ നടത്തിക്കൊണ്ടിരുന്ന സാഹചര്യത്തിലായിരുന്നു പൂരം  നടന്നുകൊണ്ടിരുന്നത്. ഈ സന്ദര്‍ഭത്തില്‍ കോത്താഴം രൂപാതദ്ധ്യക്ഷനും സിനഡ്   അംഗവുമായ ബിഷപ്പ് അന്‍പുമണി നടത്തിയ പ്രസംഗം വലിയ ക്ഷതമേല്‍പ്പിക്കുകയും അഭയയുടെ വധവുമായി ബന്ധപ്പെട്ട് നടത്തിവന്ന ക്യാമ്പയിന്റെ വിശ്വാസ്യതയെത്തന്നെ ബാധിക്കുകയുമുണ്ടായി. ബിഷപ്പിന്റെ  ഈ പ്രസ്താവന വലിയ തോതില്‍ പെന്തക്കോസ്തുകാരും  കോര്‍പറേറ്റ് മാധ്യമങ്ങളും സഭയെ ഭര്‍ത്സിക്കുന്നതിന് ഉപയോഗിക്കുകയുണ്ടായി. സഭ ആരെയെങ്കിലും കൊന്നാല്‍ അത് സമ്മതിക്കാന്‍ മടിയില്ല എന്നും, ലിസ്റ്റുണ്ടാക്കി മറ്റ് സഭക്കാരായ പലരെയും കൊലപ്പെടുത്തിയിട്ടുണ്ട് എന്ന് ബിഷപ്പ പറഞ്ഞത്, പ്രസംഗ ശൈലിയിലെ ഒരു വ്യതിയാനം മാത്രമാണെങ്കിലും അത് സഭക്ക് വലിയ പ്രതിസന്ധിയുണ്ടാക്കി. ബി ബി സി യില്‍ വരെ ഒരു വാര്‍ത്ത ആയതുകൊണ്ടു മാത്രം സഭ അതിനെ വിമര്‍ശിക്കുന്നു.

17. ബിഷപ്പ് അന്‍പുമണിയുടെ ഈ പ്രസംഗം സഭയുടെ യശസ്സിന് കനത്ത ആഘാതമാണ് ഉണ്ടാക്കിയതെന്നത് കണക്കിലെടുത്തുകൊണ്ട് ഇക്കാര്യത്തില്‍ സഭ സിനഡിനോട് അനുയോജ്യമായ നടപടി സ്വീകരിക്കണമെന്ന് സൂനഹദോസ് നിര്‍ദേശിച്ചു.

18. ശ്രീ ജൈമോന്‍  ""ധീരയായ വേദസാക്ഷി"" എന്ന് അഭയയെ വിശേഷിപ്പിക്കുകയും സിനഡുമായി സാമുദായികവും ദൈവശാസ്ത്രപരവുമായ ഭിന്നതയുള്ളവരാണ് അഭയയുടെ കുടുംബക്കാര്‍  എന്ന് അഭിപ്രായപ്പെടുകയും ചെയ്തു. ആര്‍ച്ച് ബിഷപ്പ് കുലശേഖരപ്പെരുമാള്‍  ഇവരെ ""ശീശ്മക്കാര്‍"","" എന്ന് വിശേഷിപ്പിച്ചു. പണ്ട്  കോട്ടയത്തെ ഇടവക ഇക്കൂട്ടര്‍ തീവച്ച് നശിപ്പിച്ച സമയത്താണ് ആര്‍ച്ച് ബിഷപ്പ് ഇവരെ ""ശീശ്മക്കാര്‍ , "എന്ന് വിളിച്ചത്. സഭയുടെ നിലപാട് സംരക്ഷിക്കുന്നതിനായി ""ശീശ്മ "" എന്ന ഈ പദം, അഭയയുടെ വധത്തിനുശേഷവും ആര്‍ച്ച് ബിഷപ്പ് കുലശേഖരപ്പെരുമാള്‍  പൊതുസമ്മേളനങ്ങളില്‍ ആവര്‍ത്തിക്കുകയുണ്ടായി. കൊലപാതകത്തിന്റെ ഭാഗമായി ഉയര്‍ന്നുവന്ന ജനവികാരത്തിന്റെ പശ്ചാത്തലത്തില്‍ സഭാ വിരുദ്ധ മാധ്യമങ്ങള്‍ ഈ പ്രയോഗത്തെ നമുക്കെതിരെ ഉപയോഗപ്പെടുത്താന്‍ ശ്രമിക്കുകയുണ്ടായി.

19. സഭക്കെതിരെ വ്യാപകമായ പ്രചാരണങ്ങളും ആരോപണങ്ങളും ഉയര്‍ന്നുവന്ന സാഹചര്യത്തില്‍ മേജര്‍ ആര്‍ച്ച് ബിഷപ്പും  ആര്‍ച്ച് ബിഷപ്പ്  കുലശേഖരപ്പെരുമാളും   , സഭക്ക് ഈ വധത്തില്‍ പങ്കില്ലെന്ന് വ്യക്തമാക്കി. സാമുദായിക  എതിരാളികളെ ശാരീരികമായി ഇല്ലാതാക്കുകയല്ല, സാമുദായികമായും ദൈവശാസ്ത്രപരമായും എതിര്‍ത്ത് പോരാടുകയാണ് സഭാനയം. എന്നാല്‍, സഭയില്‍പ്പെട്ട ആരെങ്കിലും യഥാര്‍ഥത്തില്‍ ഈ വധത്തില്‍ പങ്കാളിയാണെന്ന് തെളിയിക്കപ്പെട്ടാല്‍ ശക്തമായ സഭാനടപടിയുണ്ടാകും. സഭയുമായി ബന്ധപ്പെട്ട ആരെങ്കിലും ഈ സംഭവത്തില്‍ പങ്കാളികളായിട്ടുണ്ടോ എന്നു പരിശോധിക്കാന്‍ സഭ അന്വേഷണം നടത്തുന്നതാണ്.

20. സഭയാകെ ഐക്യത്തോടെ ഈ സാഹചര്യത്തെ അഭിമുഖീകരിക്കണമെന്ന് സൂനഹദോസ് ആഹ്വാനംചെയ്യുന്നു. സാമുദായിക ഉദ്ദേശ്യത്തോടെ സഭക്കെതിരായി നടക്കുന്ന പ്രചാരണത്തെ എതിര്‍ക്കുകയും തള്ളിക്കളയുകയും വേണം. കേരളത്തിലെ യുഡിഎഫ് സര്‍ക്കാരിന്റെയും കേന്ദ്രത്തിലെ യുപിഎ സര്‍ക്കാരിന്റെയും തെറ്റായ നയങ്ങള്‍ക്കെതിരെ ദൈവശാസ്ത്രപ്രസ്ഥാനം  വളര്‍ത്തിയെടുക്കുകയും വിശ്വാസിസമരങ്ങള്‍ ഉയര്‍ത്തിക്കൊണ്ടുവരികയും ചെയ്യണം. മഹത്തായ സമരങ്ങളുടെയും ത്യാഗങ്ങളുടെയും പാരമ്പര്യമുള്ള കേരളത്തിലെ സഭാഘടകം ഈ സാഹചര്യത്തെ വിജയകരമായി മുറിച്ചുകടക്കുകയും മുന്നോട്ടുപോവുകയും ചെയ്യുമെന്നതില്‍ സംശയമില്ല.

21. അഭയ കൊലക്കേസില്‍ ജൈമോനെ പ്രതിയാക്കി സഭക്കുണ്ടായ എടങ്ങേര്‍ ഒഴിവാക്കണം എന്നഭിപ്രായപ്പെട്ട ബിഷപ്പ് സൂസയുടെത്, ഒരന്ത്യോക്യന്‍ തമാശയായി കണ്ടാല്‍ മതി എന്ന ആര്‍ച്ച് ബിഷപ്പ് കുലശേഖരപ്പെരുമാളുടെ അഭിപ്രായം സൂനഹദോസ് അംഗീകരിച്ചു.

22. സഭയുടെ ഐശ്വര്യമായ ആര്‍ച്ച് ബിഷപ്പ് കുലശേഖരപ്പെരുമാളിന്റെ അടുത്ത ആരെങ്കിലും  തെറ്റു ചെയ്തു എന്ന ആരോപണം പോലും അവജ്ഞയോടെ സഭ തള്ളിക്കളയുകയാണു പതിവെന്ന് പ്രത്യേകം പറയേണ്ടതില്ലല്ലോ. ഇന്‍ഡ്യയിലെ കോടതികളില്‍ സഭക്ക് വിശ്വാസമില്ല. സഭ നിയോഗിക്കുന്ന അന്വേഷണ സംഘം അന്വേഷിക്കും. സഭക്ക് ബോധ്യം  വരുന്ന നിഗമനത്തിലും എത്തും. ഒരു ശുംഭനും അത് ചോദ്യം ചെയ്യാന്‍ സഭ സമ്മതിക്കില്ല.  ഇങ്ങനെ സഭ അന്വേഷിച്ചു കണ്ടെത്തിയതിന്റെ അടിസ്ഥാനത്തില്‍ രണ്ട്  ബിഷപ്പുമാര്‍ക്ക് ചില നേരമ്പോക്കുകളുടെ പേരില്‍ സഭ മഹറോന്‍ ശിക്ഷ വിധിച്ചത് എല്ലാവരും ഓര്‍ക്കുമല്ലോ. സഭയുടെ അന്വേഷണം കുറ്റമറ്റതാണെന്നും വിശ്വസനീയമാണെന്നും ഉള്ളതിന്,  അതു മാത്രം മതി തെളിവ്.

6 comments:

Sudeep said...
This comment has been removed by the author.
മുക്കുവന്‍ said...

22. സഭയുടെ ഐശ്വര്യമായ ആര്‍ച്ച് ബിഷപ്പ് കുലശേഖരപ്പെരുമാളിന്റെ അടുത്ത ആരെങ്കിലും തെറ്റു ചെയ്തു എന്ന ആരോപണം പോലും അവജ്ഞയോടെ സഭ തള്ളിക്കളയുകയാണു പതിവെന്ന് പ്രത്യേകം പറയേണ്ടതില്ലല്ലോ. ഇന്‍ഡ്യയിലെ കോടതികളില്‍ സഭക്ക് വിശ്വാസമില്ല. സഭ നിയോഗിക്കുന്ന അന്വേഷണ സംഘം അന്വേഷിക്കും. സഭക്ക് ബോധ്യം വരുന്ന നിഗമനത്തിലും എത്തും. ഒരു ശുംഭനും അത് ചോദ്യം ചെയ്യാന്‍ സഭ സമ്മതിക്കില്ല. ഇങ്ങനെ സഭ അന്വേഷിച്ചു കണ്ടെത്തിയതിന്റെ അടിസ്ഥാനത്തില്‍ രണ്ട് ബിഷപ്പുമാര്‍ക്ക് ചില നേരമ്പോക്കുകളുടെ പേരില്‍ സഭ മഹറോന്‍ ശിക്ഷ വിധിച്ചത് എല്ലാവരും ഓര്‍ക്കുമല്ലോ. സഭയുടെ അന്വേഷണം കുറ്റമറ്റതാണെന്നും വിശ്വസനീയമാണെന്നും ഉള്ളതിന്, അതു മാത്രം മതി തെളിവ്.


hahahaha... is it mean for party too?

Jibin Elakkatt said...

മനോഹരമായി മാഷെ, എനിക്കിഷ്ടപ്പെട്ടു..

സന്തോഷ്‌ said...

ജൈമോൻ പഴയപുരയെ തെമ്മാടിക്കുഴിയിലേയ്ക്ക് അയയ്ക്കുമോ?

kaalidaasan said...

ജിബിന്‍,

അഭിപ്രായത്തിനു നന്ദി.

kaalidaasan said...

സന്തോഷ്,

പഴയപുരയെ രണ്ടു പ്രവശ്യം VRS നല്‍കി ആദരിക്കാന്‍ സഭ തയ്യാറായതായിരുന്നു. പക്ഷെ കാലക്കേടുകൊണ്ട് അത് നടന്നില്ല. ഇനി തെമ്മാടിക്കുഴിയിലേക്ക് അയക്കും എന്നതില്‍ തര്‍ക്കമില്ല. സഭയുടെ ഒരു സെമിത്തേരിയിലും പഴയപുരയെ അടക്കം ചെയ്യില്ല. സഭയുടെ പള്ളികളില്‍ നിന്നും പുറത്താക്കാന്‍ ആണിപ്പോഴത്തെ തീരുമാനം.